Nanatanteraka Fitsarana mitety vohitra mba ho fanomezana kopia faobe ho an’ny zaza tsy ampy taona tany amin’ny Kaominina Ambatomanoina ny Fitsarana Ambaratonga Voalohany Avaradrano, izay notarihan’ny Filohany , Ramatoa RASAMIMANANA Zoliarinoro Saholy, niaraka tamin’ny mpiara-miasa aminy, ny zoma 22 Aogositra 2025 lasa teo.
Raha zaza 325 no novinavinaina hisitraka izany hetsika izany, dia tafiakatra 627 ny olona tonga nangataka kopia rehefa teny an-toerana, ka ny 624 tamin’ireo no vita hatramin’ny alin’ny zoma, ary mbola nitohy ny fizarana kopia faobe ny marainan’ny sabotsy.
Zo fototra amin’ny maha-olona ny fananana fisiana ara-dalàna amin’ny alalan’ny fanoratana ny fahaterahana any amin’ny Tompon’andraikitry ny Sora-piankohonana eny anivon’ny Kaominina kanefa dia mbola maro ireo tsy manao na tsy mahavita izany ao anatin’ny fe-potoana 30 andro apetraky ny lalàna ka lasa sakana amin’ny fisitrahana zo maro.
Miantoka tanteraka ny hoavin’ny zaza Malagasy ny fananana sora-piankohonana , ka izany indrindra no hanaovan’ny Ministeran’ny Fitsarana ezaka amin’ny alalan’ireo Fitsarana Ambaratonga voalohany miparitaka manerana ny nosy mba hanomezana didim-pitsarana misolo sora-pahaterahana ireo tsy manana ka hisitrahan’ny rehetra ny Zo maha olona azy.