Tonga nanao fitsidihana arak’asa tao amin’ Andriamatoa RAKOTOMANDIMBY Benjamin Alexis, Mpitahiry ny Fitombokasem-panjakana, Minisitry ny Fitsarana, tao amin’ny toeram-piasany eto Faravohitra, ny 28 Aprily 2025 ny Solontenan’ny FANDAHARAN’ASAN’NY FIRENENA MIKAMBANA MOMBA NY FAMPANDROSOANA (PNUD) sy ny KAOMISARIA AMBONY NY ZON’OLOMBELONA (HCDH).
Ny « Tetikasa LANDJA » izay vatsian’ny Firenena Mikambana vola no anton’ny fihaonana ka nandritra izany no nampahafantarana sy nanamafisana ny fiaraha-miasa eo amin’ny Ministeran’ny Fitsaràna sy ny PNUD ary ny Haut Commissariat aux Droits de l’Homme.
Isan’ny lohahevitra lehibe ao anatin’ny fanatanterahana ny tetikasa ny fanatsaràna sy fifehezana ny fampiharana ny « dina », mba hifanaraka amin’ny Lalàna manankery eto Madagasikara sy ny lalàna iraisam-pirenena mifehy ny Zon’olombelona.
Araka izany dia hisy dinik’asa maromaro hotanterahina mba hanatratrarana ny tanjona niarahana napetraka dia ny fandriampahalemana sy ny ady amin’ny kolikoly.