Tonga nanao Fitsidihana ara-pomba fanajana tao amin’ny Mpitahiry ny Fitombokasem-panjakana, Minisitry ny Fitsarana, Andriamatoa RAKOTOMANDIMBY Benjamin Alexis teto Faravohitra, ny mpikambana avy ao amin’ny CMIL na ny Kaomisiaona Malagasy miandraikitra ny Informatika sy ny Fahalalahana ny Alatsinainy 04 Aogositra 2025.
Ny votoatin’ny fitsidihana dia nifantoka tamin’ny fifanakalozan-kevitra mahakasika ny fametrahana ireo rantsa-mangaika sy ny andraikitra ho tanterahan’ny CMIL amin’ny fandrindrana sy fanaraha-maso ny fikirakirana ireo antontan-kevitra manokan’ny olom-pirenena (données personnelles), mifandray amin’ny lafiny fiainana manokana eto Madagasikara fa indrindra eo amin’ny sehatry ny Fitsarana.
Dingana lehibe hirosoan’ny Firenena Malagasy ara-pitantanana eo amin’ny lafiny nomerika ny fisian’ny CMIL (Commission Malagasy de l’Informatique et des Libertés), mba hanomezana antoka ny fahatomombanan’ny fahalalahana sy ny fanajana ny zon’olombelona.