Androany faha 30 ny volana Jona 2025, dia notanterahana teny amin’ny Fonjaben’Antanimora ny fananganan-tsaina.Tonga nisolo-tena ny Mpitahiry ny Fitombokasem-panjakana, Minisitry ny Fitsarana, Andriamatoa RAKOTOMANDIMBY Benjamin Alexis, ny Sekretera Jeneralin’ny Ministeran’ny Fitsarana, Ramatoa BELALAHY Hanitriniaina, niaraka tamin’ireo lehiben’ny Fitsarana sy ireo mpiara-miasa rehetra indrindra ireo Mpandraharahan’ny Fonja.
Nandritra ny fandraisam-pitenenan’ny Ramatoa Sekretera Jeneraly dia nanolotra fisaorana sy fankasitrahana ny rehetra ny tenany tamin’ny nahavitanan’ iny enim-bolana voalohany tamin’ ity taona ity iny, nohon’ ny ezaka sy ny fandraisana anjara mavitrika tamin’ireo zava-bita manan-danja teto amin’ny sehatrin’ny fitsarana.
Nambarany fa nilamina sy tsara rindra tanteraka ny drafitra rehetra napetrakin’ny Minisiteran’ny Fitsarana tamin’ireo fandraisana sy ny fanatontosana ireo hetsika lehibe sy niavaka teto amin’ny Firenena; toy ny Fihaonana an-Tampony faha-5 an’ny Vaomieran’ny Ranomasimbe Indiana (COI), izay nahatonga an’ny Madagasikara ho sehatra fifampidinihana sy fiaraha-miasa amin’ny sehatra iraisam-pirenena. Teo ihany koa ny fandrafetana sy fanendrena ireo tompon’andraikitra vaovao, na teo anivon’ireo Fitsarana isany am-baratongany, na teo anivon’ny Ministera Foibe. Nisy ihany koa ny Fihaonana manokana sy fifampidinihana mahomby teo amin’ny Governemanta sy ny Solombavambahoaka (Antenimieram-pirenena sy Antenimieran-doholona), indrindra tamin’ny fandinihana sy fanavaozana ireo tolo-dalàna hoentina hanatsarana ny fiaraha-monina Malagasy. Ary farany dia ny Fankalazana ny faha-65 taonan’ny niverenan’ny Fahaleovantenan’ny Madagasikara, izay fotoana nanamarihana ny maha izy antsika malagasy.
Nanamarika iny enim-bolana iny ihany koa hoy izy ny fahalanina tamin’ny fifidianana natao tao amin’ny Foiben’ny Firenena Mikambana tany Etazonia, ny Talen’ny Zon’olombelona sy ny Fifandraisana Iraisam-pirenena (DDRHI) ho mpikambana ao amin’ny « Komitin’ny Firenena Mikambana » misahana ny fiarovana ny mpiasa mpifindra monina sy ny fianakaviany.
Amin’izao fanatrehana izao enim-bolana faharoa izao hoy hatrany Ramatoa Sekretera Jeneraly dia hiatrika ny EPU na ny « Examen Périodique Universel» any Génève, ka mitarika ny Delegasionina dia ny Mpitahiry ny Fitombokasem-panjakana Minisitry ny Fitsarana Andriamatoa RAKOTOMANDIMBY Benjamin Alexis, ary ao ihany koa ny fanomana handraisana ny Fihaonana an-tampony ny vondrona SADC, izay ho tanterahana eto Madagasikara, amin’ny volana Aogositra ho avy izao.
Nanolotra firarintsoa ho an’ny mpiara miasa rehetra ny tenany tamin’ny fahamaranany ny lahateniny.