𝗙𝗮𝗺𝗽𝗮𝗵𝗮𝗳𝗮𝗻𝘁𝗮𝗿𝗮𝗻𝗮 𝗻𝘆 𝗽𝗮𝗶𝗸𝗮𝗱𝘆 𝘀𝘆 𝗳𝗶𝘇𝗼𝘁𝗿𝗶𝗻’𝗻𝘆 𝗿𝗮𝗵𝗮𝗿𝗮𝗵𝗮𝗺-𝗽𝗶𝘁𝘀𝗮𝗿𝗮𝗻𝗮 𝘀𝘆 𝗳𝗮𝗻𝗮𝗺𝗮𝗳𝗶𝘀𝗮𝗻𝗮 𝗻𝘆 𝗺𝗮𝗵𝗮-𝗢𝗹𝗼𝗻𝗮 𝗮𝗼 𝗮𝗻𝗮𝘁𝗶𝗻’𝗻𝘆 𝗙𝗮𝗻𝗸𝗮𝗹𝗮𝘇𝗮𝗻𝗮 𝗻𝘆 𝗳𝗮𝗵𝗮-𝟮𝟱 𝘁𝗮𝗼𝗻𝗮 𝗻𝘆 𝗙𝗶𝘁𝘀𝗮𝗿𝗮𝗻𝗮 𝗔𝗺𝗯𝗮𝗿𝗮𝘁𝗼𝗻𝗴𝗮 𝗩𝗼𝗮𝗹𝗼𝗵𝗮𝗻𝘆 𝗔𝗿𝗶𝘃𝗼𝗻𝗶𝗺𝗮𝗺𝗼.

Tanteraka ny 20 Jona 2025 tao amin’ny Fitsarana Ambaratonga Voalohany Arivonimamo ny fampahafantarana amin’ny fomba ofisialy ny paik’ady sy ny fizotrin’ ny raharaham-pitsarana, ho ampahany amin’ny fanatanterahana ny tanjon’ny Fitsarana manakaiky vahoaka. Tafiditra ao anatin’izany ny fanazavana mahakasika ny ady madio sy ny ady heloka tsotra, ary koa ny famotorana amin’ny sehatra ara-dalàna, izay notanterahana teo anatrehan’ny Fampanoavana, ny Mpitsara mpanao famotorana ary ny mpitsara momba ny zaza tsy ampy taona.

Ankoatr’izany ihany koa dia nisy ihany koa ny fanehoana ny anjara andraikitrin’ny Mpiraki-draharaha sy ny Lehibeny, nanomboka amin’ny fandraisana sy fanatanterahana ny raharaha ka hatramin’ny famoahana ny didim-pitsarana. Nandray anjara mavitrika sy nanotroka tamin’ny ireo hetsika ireo ny solombavam-bahoaka voafidy avy ao amin’ny Distrikan’Arivonimamo, ireo Talem-paritra sy ny Lehiben’ny sampandraharaham-panjakana isan-tsokajiny, ireo Ben’ny Tanàna miisa 23, ny mpitandro filaminana sy ny mpandraharahan’ny fonja, ary ireo olom-pirenena liana amin’ny raharaham-pitsarana.

Manamarika manokana ity hetsika ity, izay tarihin’ny Filohan’ny Fitsarana Ramatoa RAKOTONDRANOA Lalasoa Emma sy Tonia Mpampanoa Lalàna Ramatoa RAMANGASON Miarantsoa, ny fankalazana ny faha-25 taonan’ny Fitsarana Ambaratonga Voalohany tao Arivonimamo, izay tanterahina amin’ny endrika maro sy amin’ny sehatra samihafa.

Ny 19 Jona lasa teo dia nisy ihany koa ny hetsika nahitana fampiharana mivaingana amin’ny fanajana ny maha-olona. Tamin’ny fiaraha-miasan’ny Ministeran’ny Fahasalamam-bahoaka sy ny Ministeran’ny Fitsarana, tamin’ny alalan’ny Fitaleavam-paritry ny Fahasalamam-bahoaka Itasy sy ny Fitsarana Ambaratonga Voalohany Arivonimamo, ka dia tanteraka ny fandraisana andraikitra ho fikarakarana manokana ny fahasalaman’ny olona voafonja lahy sy vavy. Tafiditra tao anatin’izany ny fanadiovana sy ny fanondrahana ny zaridainan’ny Fonja sy ny manodidina, ho fiarovana sy fanatsarana ny tontolo iainana sy ny fahasalamana ao anatiny.

Tanterahina ihany koa amin’ny Kaominina Ambanivohitra sasany ny hetsika mitovitovy amin’izany, ho fanatontosana ny tanjona lehibe amin’ny fanakaikezana ny Fitsarana amin’ny vahoaka sy fanamafisana ny maha-olona ao anatin’ny rafitra rehetra.