Androany 12 Septambra 2025, dia notanterahana tao amin’ny Minisiteran’ny Tontolo Iainana sy ny Fandrosoana Lovainjafy tao Ampandrianomby ny lanonana fanolorana fitaovana natao hanaraha-maso ny tontolo iainana sy fitaovam-piarovana manokana ho an’ireo polisy manokan’ny tontolo iainana (OPJE : Officiers de Police Judiciaire de l’Environnement).
Nisongadina tamin’ireo natolotra, ny fitaovana fandrefesana ny setroka mivoaka avy amin’ny fiara sy fitaovana ho an’ny fitsirihana ny fampiasana merikiora, ny entona manempotra (CO2), niampy ireo karazam-pitaovana sy fanamiana manokana (équipements de protection individuelle) ho fiarovana ireo mpiasan’ny OPJE eo am-panatanterahana ny asa.
Natao izao mba hanamorana ny asa fitsirihana sy ho fanaraha-maso ny fampiharana ny lalàna momba ny tontolo iainana, ka hanatsarana ny vokatra azo amin’ny ady amin’ny fahalotoan’ny tontolo iainana sy ho fiarovana ny fahasalamam-bahoaka.
Maneho fanohanana mivaingana amin’izany ny Minisiteran’ny Fitsarana, koa nanome voninahitra ny lanonana, nisolotena ny Mpitahiry ny Fitombokasem-panjakana, Minisitry ny Fitsarana, Andriamatoa RAKOTOMANDIMBY Benjamin Alexis, ny Sekretera Jeneralin’ny Minisiteran’ny Fitsarana, Ramatoa BELALAHY Hanitriniaina, izay fiaraha-miasa lehibe amin’ny fanamafisana ny fampiharana ny lalàna.