𝗙𝗮𝗻𝗼𝗺𝗯𝗼𝗵𝗮𝗻𝗮 𝗻𝘆 𝗗𝗿𝗮𝗳𝗶𝘁𝗿𝗮 𝗦𝘁𝗿𝗮𝘁𝗲𝗷𝗶𝗸𝗮 𝗩𝗮𝗼𝘃𝗮𝗼 𝟮𝟬𝟮𝟱–𝟮𝟬𝟯𝟬 𝗮𝗻’𝗻𝘆 𝗔𝗻𝗱𝗿𝗶𝗺-𝗽𝗮𝗻𝗷𝗮𝗸𝗮𝗻𝗮 𝗔𝗺𝗯𝗼𝗻𝘆 𝗠𝗶𝘀𝗮𝗵𝗮𝗻𝗮 𝗻𝘆 𝗙𝗮𝗻𝗸𝗮𝘁𝗼𝗮𝘃𝗮𝗻𝗮 𝘀𝘆 𝗻𝘆 𝗙𝗮𝗻𝗮𝗿𝗮𝗵𝗮-𝗺𝗮𝘀𝗼 (𝗜𝗦𝗖) 𝗲𝘁𝗼 𝗠𝗮𝗱𝗮𝗴𝗮𝘀𝗶𝗸𝗮𝗿𝗮

Notontosaina androany 17 jona 2025, teto amin’ny Fitsarana Tampony Anosy ny fanombohana ny Drafitra Stratejika Vaovaon’ny taona 2025–2030 izay an’ny Andrim-panjakana Ambony Misahana ny Fankatoavana sy ny Fanaraha-maso (ISC) eto Madagasikara. Ity Andrim-panjakana Ambony Misahana ny Fanaraha-maso ny Fitantanam-bolam-panjakana ity moa dia rafetin’ny Fitsarana momba ny Kaonty sy Fitsarana ara-bola, ny tanjony amin’izany dia ny hanome ny anjara biriky amin’ny fitantanana ny raharaham-panjakana, hanamafy ny toeran’ny andrim-panjakana eo amin’ny sehatra ofisialy ary ny hanatsara ny fitantanana anatiny.

Tonga nanokatra izany fotoana izany tamin’ny fomba ofisialy, Andriamatoa RAKOTOMANDIMBY Benjamin Alexis, Mpitahiry ny Fitombokasem-panjakana, Minisitry ny Fitsarana.

Tao anatin’ny lahatenin’Andriamatoa Minisitra dia nanambara ny tenany fa tsy zava-baovao ho an’ny Fitsarana momba ny Kaonty ny ezaka amin’ny fanatsarana satria nandritra ny fe-potoana 2020–2024, dia efa nisy dingana lehibe vita, toy ny fanamafisana ny toeran’ny Fitsarana eo amin’ny rafitra fanapariahana sy fanaraha-maso ny tetibola, izay nahatonga azy ho “mission” amin’ny sehatra nasionaly, ny fanatsarana ny kalitaon’ny tatitra arakin’ny fenitra iraisam-pirenena ary ny fanamafisana ny fahatokisan’ny vahoaka sy ny mpiara-miombon’antoka amin’ny alalan’ny fanehoana ampahibemaso ireo vokatra.

Noho izany ho an’ny taona 2025–2030, dia mazava tsara ny vina: ho andrim-panjakana mahaleo-tena, azo itokisana, ary mitondra fanatsarana ho an’ny fiainan’ny olom-pirenena. Tafiditra ao anatin’izany, ny fanamafisana ny fahaiza-manao amin’ny alalan’ny fanofanana sy ny fampitaovana ara-teknolojia, ny fanatsarana ny fifandraisana amin’ny vahoaka sy ny mpiara-miombon’antoka, ny fanohanana ny mpitantana eo anivon’ny kaominina.

Amin’ny maha Minisitry ny Fitsarana azy moa dia nanentana ny mpiara-miombon’antoka tsy ankanavaka izy mba hanohana ny ezaka izay hataon’ny Fitsarana momba ny Kaonty amin’ny fanatanterahana ny Drafitra Stratejikany.

Farany dia nanolotra ny fiarahabana manokana ny Fitsarana momba ny Kaonty amin’ny nahavitàny ity Drafitra Stratejika vaovao ity ny tenany ary nirary fahombiazana amin’ny andraikitra izay nomen’ny Lalàna azy.