𝐀𝐨 𝐚𝐧𝐚𝐭𝐢𝐧’𝐧𝐲 𝐟𝐚𝐧𝐤𝐚𝐥𝐚𝐳𝐚𝐧𝐚 𝐧𝐲 𝐟𝐚𝐡𝐚 𝟔𝟓 𝐭𝐚𝐨𝐧𝐚 𝐧𝐢𝐯𝐞𝐫𝐞𝐧𝐚𝐧’𝐧𝐲 𝐟𝐚𝐡𝐚𝐥𝐞𝐨𝐯𝐚𝐧-𝐭𝐞𝐧𝐚𝐧’𝐢 𝐌𝐚𝐝𝐚𝐠𝐚𝐬𝐢𝐤𝐚𝐫𝐚 : 𝐍𝐚𝐧𝐚𝐨 𝐡𝐞𝐭𝐬𝐢𝐤𝐚 𝐚𝐫𝐚-𝐤𝐨𝐥𝐨𝐧𝐭𝐬𝐚𝐢𝐧𝐚 𝐧𝐲 𝐭𝐞𝐧𝐲 𝐚𝐦𝐢𝐧’𝐧𝐲 𝐅𝐢𝐭𝐬𝐚𝐫𝐚𝐧𝐚 𝐀𝐦𝐛𝐚𝐫𝐚𝐭𝐨𝐧𝐠𝐚 𝐕𝐨𝐚𝐥𝐨𝐡𝐚𝐧𝐲 𝐀𝐧𝐭𝐚𝐧𝐚𝐧𝐚𝐫𝐢𝐯𝐨

Anio 20 jona 2025, dia nanantanteraka hetsika ara-kolontsaina ny teny amin’ny Fitsarana Ambaratonga Voalohany Anosy, izay ao anatin’ny fanamarihana ny fiverenan’ny fahaleovantenan’i Madagasikara, izay notarihan’ny Filoha sy ny Tonia Mpampanoa Lalàna eto anivon’ny Fitsarana Ambaratonga Voalohany Antananarivo.

Ny tara-kevitra nosafidiana tamin’ity taona ity ho an’ny fankalazana manokana ny fiverenan’ny fahaleovantena moa dia ny hoe “Ny Fitiavan-tanindrazana, mitarika fandrosoana”, ka tao anatin’ity hetsika ity no nandraisana ny tarigetra manao hoe : “Ny Firaisan-kina ao anatin’ny Fahasamihafana”, izany dia mba ho fanehoana fa na dia samy hafa fihaviana sy kolontsaina aza ny mpiara-miasa rehetra eto anivon’ny Fitsarana Ambaratonga Voalohany sy ireo manan-draharaha rehetra dia miorina hatrany amin’ny fitoniana sy ny fandrosoana iombonana amin’ny maha Malagasy azy ireo.

Nandritrin’ny fandraisam-pitenenana izay nataon’ny Filohan’ny Fitsarana Ambaratonga Voalohany, Ramatoa RASOLOLALAO Hortense Angèle, izay nisolo-tena ireo mpiara-miasa rehetra eo anivon’ny Fitsarana Ambaratonga Voalohany, dia nanambara ny tenany fa ny tanjona an’izao hetsika izao dia ny fampahatsiahivana ny lanjan’ny Firaisan-kina sy ny Fitiavan-tanindrazana, izay iorenan’ny asa sy andraikitrin’ny Fitsarana amin’ny fanompoam-bahoaka.

Nampatsiahivin-dRamatoa Filoha fa isaky mamoaka didy ny Fitsarana, na ady heloka, na ady madio, na ady ara-barotra, na arak’asa dia manao izany amin’ny anaran’ny vahoaka Malagasy, hanaporofoana ihany koa fa mifototra amin’ny soatoavina iombonana ny asa rehetra atao.

Izao hetsika izao moa dia tohin’ny fandraisana anjara tamin’ny hetsika ara-kolontsaina izay notanterahana teny amin’ny « Parvis Analakely » tamin’ny faha 02 ny volana Jona lasa teo.