Nanatanteraka fanadiovana faobe, anio 29 Jolay 2025, ny fianakaviamben’ny Fitsarana, izay natao tety amin’ny faritra manodidina ny Minisiteran’ny Fitsarana ; izay notarihan’ny Mpitahiry ny Fitombokasem-panjakana, Minisitry ny Fitsarana, Andriamatoa RAKOTOMANDIMBY Benjamin Alexis.
Niainga avy tamin’ny toerana samy hafa ireo mpandray anjara rehetra, nisy teny amin’ny Lycée Jules Ferry Faravohitra, FJKM Ambatonakanga ary Pharmacie Pergola Antaninarenina, ka samy nifarana teo amin’ny Minisiteran’ny Fitsarana.
Izao fanadiovana lehibe izao dia fanehoana firaisan-kina ao anatin’ny Fianakaviamben’ny Fitsarana, adidy ihany koa amin’ny maha olom-pirenena, indrindra ho fandraisan’andraikitrin’ny Minisiteran’ny Fitsarana amin’ny fanomanana ny fandraisana ara-panjakana ny fivoriana faratampon’ny SADC, sy mba ho voninahi-pirenena amin’ny fandraisana ireo vahiny.
Nandray anjara tamin’izany ny Minisiteran’ny Fitsarana foibe, ny Fitsarana Tampony sy ny Filan-kevitra Ambonin’ny Mpitsara, Ny Tendrom-pitsarana Miady amin’ny Kolikoly, Ny Sekolim-pirenena Mampiofana ho Mpitsara sy Mpirakidraharaha, Ny Fitsarana Ambony, ny Fitsarana Ara-bola sy ny Fitsarana Misahana ny ady ifanaovana amin’ny Fanjakana, ny Fitsarana Ambaratonga Voalohany, ary ny ao amin’ny Fandraharahana ny fonja.
Ny zoma 01 volana aogositra 2025 kosa dia hitohy eny amin’ny faritra Andohatapenaka indray ny asa fanadiovana izay ho ataon’ny fianakaviamben’ny Fitsarana.