Mois : septembre 2022

📌 Hamaranantsika ireo tsara ho fantatra mahakasika ny Didim-pitsarana misolo sora-pahaterahana na ny « Jugement supplétif de naissance » dia indro entina amintsika ireo taratasy ilaina amin’izany sy ny fizotry ny paik’ady.

🔷 IREO ANTONTAN-TARATASY ILAINA :
👉Taratasy fangatahana,
👉Taratasy fanamarinana fikarohana tsy nahitambokatra avy amin’ny Kaominina nahaterahana (certificat de recherches infructueuses),
👉Taratasy manamarina ny fahatarana fanambarana avy amin’ny Kaominina nahaterahana,
👉Taratasy manamarina avy amin’ ny mpitsabo mpiasam-panjakana mamaritra ny mety ho taona sy ny maha lahy na maha vavy ilay olona tsy manana kopia (certificat d’examen somatique),
👉Fanamarinam-ponenan’ny mpangataka,
👉Sora-pahaterahan’ireo ray aman-dreny sy ny sora-panambadiana raha vita soratra,
👉Ny dika mitovin’ny karapanondron’ny vavolombelona 2.

🔷 MAIMAIMPOANA VE NY FAMPIDIRANA NY FANGATAHANA ENY AMIN’NY FITSARANA ?
Eny, tsy misy sarany aloa fa maimaimpoana.

🔷 TSARA HO FANTATRA MIKASIKA NY PAIK’ADY ARAHINA SY NY FOTOAM-PITSARANA :
🔸 Ampidirina ao amin’ny lehiben’ny mpirakidraharaham-pitsarana ireo antontan-taratasin’ady voalaza teo ambony,
🔸 Ny mpangataka dia tsy maintsy miseho eo anoloan’ny fitsarana miaraka amin’ny zaza angatahana kopia sy ny vavolombelona roa feno 21 taona farafahakeliny, efa manana kara-panondrom-pirenena,
🔸 Ampahibemaso azon’ny olona rehetra atrehina ny fotoam-pitsarana,
🔸 Ento izay porofo rehetra hanohananao ny fangatahanao.

🔷 REHEFA MIVOAKA ILAY DIDIM-PITSARANA :
🔹 Entina any amin’ny Kaominina nahaterahan’ilay olona ilay didy,
🔹 Izay vao afaka manoratra ny fahaterahana ao amin’ny boky firaiketana ny tompon’andraikitry ny sora-piankohonana,
🔹 Afaka mamoaka sora-pahaterahana amin’izay ilay Kaominina avy eo.

👉 Fanombohana tamin’ny fomba ofisialy ny Hetsika fanomezana sora-pahaterahana sy karampanondrom-piren­ena maimaimpoana teto amin’ny distrikan’i Toamasina I, ny 28 septembra 2022. Tonga nanokatra izany ny filoha lefitry ny Antenimierampirenena­, R/toa Naharimamy Irmah sy ny loholon’i madagasikara Voafidy taty @ faritany Toamasina, A/toa Manasoa Donnat Tang, ny goveroran’ny faritra Atsinanana, ny préfet sy ny bén’ny tananan’i Toamasina .

👉 Notanterahina ny Alarobia 28 Septambra 2022 ny varavarana misokatra (porte ouverte) tao amin’ny tokontanin’ny Fitsarana Ambaratonga Voalohany eto Mananjary. Nandray anjara tamin’izany ny tompon’andraikitra rehetra ao anatin’ny tontolon’ny Fitsarana (mpitsara, mpirakidraharaha, mpisolovava, vaditany, notary, mpandraharaha ny fonja).
Fampahafantarana ny asam-pitsarana amin’ny ankapobeny sy fitondràna fanazavana manoloana ny fanontaniana napetrak’ireo tonga namaly ny antso no tena tanjona tamin’izany. Izany no natao dia mba ho fanantanterahina ny politikan’ny Minisiteran’ny Fitsarana dia ny Fitsarana manakaiky vahoaka.

📌 Tonga nanao fitsidihana teto amin’ny Minisiteran’ny Fitsarana tao amin-dRamatoa RABY SAVATSARAH , Sekretara Jenaraly, ireo solon-tena avy amin’ny « Association Albinos Madagascar ».

➡Niompana tamin’ny fiarovana ny zon’ireo olona tratran’ny « Albinisme » manoloana ny herisetra mianjady amin’izy ireo ny resaka. Manan-jo tahaka ny olom-pirenena rehetra izy ireo ary manana zo hiaina malalaka. Nangataka moa ireo solon-tena ny tokony hijeren’ny Minisitera politika famaizana faran’izay enjana ho an’ireo manao herisetra amin’ny olona tratran’ny « Albinisme. Manantena fiaraha-miasa akaiky amin’ny olona rehetra tsy ankanavaka ireo olona tratran’ny « Albinisme » ireo hoy hatrany ny « Association Albinos Madagascar ».

📌 Mitohy hatrany ny hetsika fanomezana sora-pahaterahana sy karampanondrom-piren­ena ho an’ny olom-pirenena efa feno taona (18 taona) . Nosokafana anio Alarobia 28 septambra 2022 tamin’ny fomba ofisialy ny fanaovana izany teto amin’ny faritra Menabe ka teto Morondava no nanaovana izany.

⭐ Tonga nanome voninahitra ny fotoana ireo olo-manakaja maro eto Morondava, notarihan’ ny Préfet sy ny Gouvernora ary ny tale avy any amin’ny Minisiteran ny Atitany sy ny Fitsinjaram-pahefana­.

✅ Hita ho mavitrika ny olona satria maro no tonga hisitraka izany.
▪️46 ireo olona efa manana sora-pahaterahana nefa tsy nanana karam-panondrom-pirenena ka avy hatrany dia nisitraka izany,
▪️133 kosa ny olona vao nanaovana « jugements supplétifs » ka raha atambatra izany dia olona 179 no nahazo karam-panondrom-pirenena ho an’ity andro ity sady avy hatrany dia voasoratra ao anaty lisi-pifidianana.

Fananganan-tsaina teto amin’ny tokotanin’ny Fonjaben’Antanimora izay notarihan’ny Mpitahiry ny Tombokasem-panjkana,­ Ministry ny Fitsarana, A/toa RAKOTOZAFY François ary nampitàny ireo vaovao farany mahakasika ny fitokanana ny Lapan’ny Fitsarana tao Ambilobe ary koa ireo fotodrafitr’asa izay efa vonona hotokanana ary ny fananganana ny Fonjabe vaovao any Antsiranana.