Catégorie : Annonces et Informations

📌Mitohy ny fizarana amintsika mikasika ny lohahevitra Fandraisana anjara amin’ny fandaniana ao an-tokantrano na « Contribution aux charges du ménage » ka ireo antontan-taratasy ilaina amin’ny fangatahana sy ny vola fanao an-tratra na provision tandrify amin’izany no entina amintsika androany.

🔷INONA AVY IREO TARATASY ILAINA ?
👉Taratasy fangatahana alefa amin’ny Lehiben’ny Fitsarana, misy ny adiresy mazavan’ny mpangataka sy ny toriana ary mamaritra mamazava tsara ny vola angatahana,
⭕ Fanamarihana : azon’ny mpangataka atao ny mangataka amin’ny Fitsarana ny hanapahana avy hatrany amin’ny karaman’ny toriana izany vola izany
👉Ny sora-panambadiana,
👉Ny sora-pahaterahan’ny zanaka,
👉Ny taratasy fanamarinana ny vola miditra amin’ireo mpivady (ohatra : fanamarinan-karama),
👉Ny taratasy rehetra manamarina ny fandaniana ao an-tokantrano (ohatra : rosia nandoavana ny sarampianaran’ny zaza, ny sakafo…)
⭕ Tsy voafetra ho ireo ny taratasy ilaina fa mety misy hafa ihany koa izay takian’ny Fitsarana.

🔷AVANTANA AMIN’IZA ARY IREO REHETRA IREO ?
Amin’ny Lehiben’ny mpirakidraharaham-pitsarana
🔷SARAN’NY FAMPIDIRANA NY FANGATAHANA ENY AMIN’NY FITSARANA
Enina arivo sy roa alina Ariary (26.000 Ar).
Izay aloa ao amin’ny lehiben’ny mpirakidraharam-pitsarana ka manome rosia nandoavana izany.

📌Lohahevitra vaovao indray no entina amintsika manomboka amin’ity herinandro ity. Raha nijery ny mahakasika ny solon-tsakafo na « Pension alimentaire » isika nandritry ny herinandro maromaro dia nisy ny nametra-panontaniana hoe manahoana indray raha toa ka mpivady ara-dalàna tsy misara-panambadiana kanefa tsy mety mamelona ny ankohonana ilay vady.
➡ Amin’izay fotoana izay dia mila mangataka eo anatrehan’ny Fitsarana ny atao hoe Fandraisana anjara amin’ny fandaniana ao an-tokantrano na « Contribution aux charges du ménage » ny ankilany ka izany no lohahevitra vaovao entina amintsika mandritry ny herinandro vitsivitsy.

🔷IZA NO TOKONY HANDRAY ANJARA AMIN’NY FANDANIANA AO AN-TOKANTRANO ?
👉 Ny mpivady dia tsy maintsy miara-mandray anjara amin’ny fandaniana ao an-tokantrano ;
👉 Koa raha tsy manao ny adidiny ny iray amin’izy ireo, dia azon’ny andaniny atao ny mangataka ny Fitsarana handidy ny handoavan’ny ankilany ny anjarany ara-bola hikarakarana ny tokantrano sy ny fianaran’ny zanak’izy ireo ;

🔷INONA NO FEPETRA TAKIAN’NY LALANA AHAFAHANA MANGATAKA IZANY ?
Tsy maintsy mpivady vita soratra ara-panjakana ary tsy mbola an-dàlam-pisaraham-panambadiana.

🔷IZA NO FITSARANA MAHEFA HANDRAY NY FANGATAHANA ?
Fitsarana Ambaratonga Voalohany (Fitsarana mikasika ny ady madio) ao amin’ ny toeram-ponenan’ny mpivady.

📌 Hamaranana ireo tsara ho fantatra mikasika ny solon-tsakafo na « Pension alimentaire » dia entina amintsika indray androany ireo antontan-taratasy ilaina amin’izany sy ny saran’ny fampidirana fangatahana eny amin’ny Fitsarana.

🔷 IREO ANTONTAN-TARATASY ILAINA :
👉 Taratasy fangatahana alefa amin’ny Lehiben’ny Fitsarana, misy ny adiresy mazavan’ny mpangataka sy ny toriana ary mamaritra mazava tsara ny mari-bola angatahana,
👉 Ny sora-panambadiana sy ny dika mitovin’ny bokim-pianakaviana (raha nisoratra ara-panjakana),
👉 Ny sora-pahaterahan’ireo zaza iombonana (nateraka na natsangana na nozanahana),
👉 Ny sora-panjanahana na sora-pananganan’ireo zaza iombonana,
👉 Ny taratasy fanamarinana ny vola miditra amin’ ireo ray aman-dreny (ohatra : fanamarinan-karama),
👉 Ny taratasy rehetra manamarina ny fandaniana momba ireo zaza (ohatra : rosia nandoavana ny saram-pianarana, ny fandaniana aminy isam-bolana).

🔸 Tsy voafetra ho ireo ny taratasy ilaina fa mety misy hafa ihany koa izay takian’ny Fitsarana.

🔷 AVANTANA AMIN’IZA ARY IREO REHETRA IREO ?
Amin’ny Lehiben’ny mpirakidraharaham-pitsarana.

🔷 SARAN’NY FAMPIDIRANA NY FANGATAHANA ENY AMIN’NY FITSARANA
• Roa arivo sy telo alina Ariary (32.000 Ar)
• Izay aloa ao amin’ny lehiben’ny mpirakidraharaham-pitsarana ka manome rosia nandoavana izany

📌 Tohin’ny fampahafantarana mikasika ny solon-tsakafo na « Pension alimentaire » dia entina amintsika indray androany ireo tsara ho fantatra mahakasika ny paik’ady arahina eny amin’ny Fitsarana sy manodidina izany.

🔷 NY PAIK’ADY :
👉 Mahazo fiantsoana hiatrika fitsarana ny ray sy ny reny ary izy ireo irery ihany no manatrika izany fa tsy soloina tena,
👉 Didim-pitsarana mivoaka ampahibemaso no mametra ny solon-tsakafo aloan’ilay toriana amin’ny ankilany ary izany didy izany dia tanterahina avy hatrany na dia nanao fampakàrana Fitsarana Ambony aza izy.

🔷 MBOLA AZO ANGATAHANA FAMPIAKARANA NA FAMPIDINANA VE NY MARI-BOLA SOLON- TSAKAFO VOAFARITRA AO ANATY DIDY ?
➡Eny, raha toa ka misy fiovana eo amin’ny fidiram-bolan’ireo ray aman-dreny na ny filàn’ ireo zaza iombonana.
🔸 Ohatra : fiakaran’ny fandaniana momba ireo zaza iombonana, fiovana asa ka niteraka fihenana na fisondrotan’ny karama…
🔷 ARY AZON’ILAY NOTORIANA ATAO IHANY KOA VE NY MANGATAKA NY HAMPITSAHARANA MIHITSY ILAY FANDOAVANA SOLON-TSAKAFO ?
➡Eny, raha toa ka nafindra aminy ny fihazonana ny zaza iombonana

📌 Taorian’ny fampahafantarana mikasika ny fisaraham-panambadiana na « Divorce » dia indro lohahevitra vaovao indray no entina amintsika dia ireo tsara ho fantatra mikasika ny solon-tsakafo na « Pension alimentaire ».

🔷 INONA NY ATAO HOE « SOLON-TSAKAFO »
• Vola aloan’ny ray na ny reny amin’ny iray amin’izy ireo entina iantsorohana ny famelomana ny zaza iombonana (nateraka na natsangana na nozanahana),
• Adidy sy andraikitry ny ray aman-dreny ny mikarakara sy mandray an-tànana ny fiainana sy ny fianaran’ny zanany,
• Ferana arakaraky ny fidiram-bolan’ny andaniny sy ny ankilany ary ny filàn’ireo zanany.

🔷 RAHOVIANA NO AFAKA ANGATAHINA IZANY ?
 Amin’ny fotoana hampidirana ny fangatahana ny fisaraham-panambadiana eny anivon’ny Fitsarana,
 Ho an’ireo ray aman-dreny tsy vita soratra ara-panjakana kosa fa nanjanaka ilay zaza iombonana fotsiny ihany ny rainy dia afaka mangataka izany eny anivon’ny Fitsarana ny iray amin’izy ireo izay mihazona ny zaza iombonana.
🔷 IZA NO FITSARANA MAHEFA RAHA HANAO FANGATAHANA :
Fitsarana Ambaratonga Voalohany (Fitsarana ady madio) ao amin’ny toeram-ponenan’ny toriana